Burdinaren mendia
Zeraingo gaur egungo egoera ezagutzeko beharrezkoa da antzinako meatzaritza ezagutzea. XI. mendetik hona Aizpeko meategiak osatzen duten 150 hektareatan burdina atera da. Ustiaketa honen ondorioz, paisaia berezi bat garatu da Aizkorri-Aratz Parke Naturalaren barruan dagoen inguru honetan. Paisaia honek mendi guztia hartzen du eta Eusko Jaurlaritzak Multzo Monumentala izendatu du. Euskal meatzaritza ulertzeko garrantzi handiko meatze multzoa da honako hau eta hainbat elementu aurkituko ditugu bertan: harrobiak, galeriak, inklinatutako planoak, trenbideak, kableak…kiskaltze labe erraldoiak eta lanbide honi lotutako hainbat aztarna: polborinak, konponketarako lantokiak, tabernak, bulegoak, zisterna artifizialak…
Aizpittako Interpretazio Zentroan hasiko da bisita: bertan azalduko dizute burdinak Euskal Herrian izan duen garrantzia eta ingurune hau Eusko Jaurlaritzak Multzo Monumentala izendatu izanaren arrazoia. XI. mendetik hona gure mendietako burdinaren ustiapenaren industriak paisaian, gizartean eta ekonomian izan duen eragina ezagutuko duzu.
